GENERAL SANTOS CITY – Daghang mga anggulo ang ginatutukan karon sa kapulisan sa pagpusil-patay sa barangay kapitana sa Baluntay, Alabel, nga natigayon sa Balutan area sa Prk Tahimik, Brgy Baluan ning dakbayan miaging gabii.
Lakip niini ang land conflict, love triangle, ug personal nga problema sa biktima nga si Kapitana Jonalyn Sumagca, nga kahinumduman nga gipusil sa riding in tandem.
Nadala pa ug nahimong kritikal sa balay-tambalanan ang biktima, apan nakabsan gihapon sa kinabuhi.
Narekober sa crime scene ang duha ka fired cartridge ug usa ka slug sa caliber 45 pistol.
Sa karon gipaabot pa sa kapulisan nga mutungha sa ilang buhatan ang kabanay sa kapitana, aron magpasang-at ug kaso ug mapangayuan ug mga pahayag ug testimonya nga makatabang aron matumbok ang tinuod nga motibo ug posibleng ilhanan sa suspek.
Kini human mihangyo ang pamilya sa biktima nga ipahiluna una nila ang patay’ng lawas ni Sumagca. Kahibaluan nga angol usab ang kapuyo sa kapitana nga si Johnny Kinjiyo nga kauban niya kaniadtong higayuna.
Sa karon, gibutyag ni Police Chief Inspector Peter Pinalgan, hepe sa Lagao Police Station, nga padayon ang ginahimo nilang imbestigasyon kalabot sa nasampit nga krimen, kung asa may ginahuptan matud pa sila nga inisyal nga description sa mga suspek.
