GENERAL SANTOS CITY -Kabahin sa hugot nga direktiba sa labaw sa kapulisan dinhi sa rehiyon dose nga gipa-validate kon tinuod nga ISIS-inspired group ang responsable sa pagpabusikad sa improvised explosive device sa Maitum, Sarangani human nga nakit-an ang flag sa ISIS.
Kini ang gibutyag ni Chief Insp. Aldrin Gonzales, ang tigpamaba sa Police Regional Office -12 kon asa sumala sa nasampit, basin aduna lamang misakay nga laing grupo og posibleng naghimo himo lamang og flag sa ISIS.
Sa iyang pamahayag nga posibleng gusto lang manghadlok sa nagpaluyo sa pagpabusikad og IED tungod wala sa pampublikong lugar gihimo inay gibilin lang ang eksplosibo daplin sa dalan.
Bisan pa niana, wala gi-‘discount’ o gibalewala ang hitabo luyo nga walay nasamaran.
Sa pamahayag pa ni Gonzales nga dili lang ang pagbusikad sa Maitum, kon dili gipatutukan ni Police C/Supt. Cedric Train, regional director sa PRO-12 ang tanang porma sa kriminalidad nga gakahitabo sa Socsargen.
Nagpadayon ang post blast investigation aron masayran ang ‘signature’ sa IED nga mibusikad.
Migawas sa imbestigasyon sa EOD Team nga gama sa bala sa 81 mm mortar ang mibusikad nga IED.
