GENERAL SANTOS CITY- Karong adlawa, Lunes, gikatakdang ipasan-at sa PDEA-12 ang kasong pagsupak sa RA 9165 o Comprehensive Dangerous Drugs Act of 2002, ug RA 10591 o Comprehensive Law on Firearms and Ammunition, batok kang Maasim, Sarangani Mayor Aniceto Jun Lopez.
Gumikan kini sa mga narekober nga usa ka kilo sa suspected shabu nga nagkantidad ug lima ka milyon ka pesos, ecstasy, small kitchen shabu laboratory, duha ka rifle grenade launcher, duha ka granada ug duha ka caliber .45 pistol, atul sa gipahigayong raid sa iyang rest house kaniadtong Biyernes.
Kini luyo nga nagnegatibo ang nasampit sa drug test.
Una nang gibutyag sa Bombo Radyo ni PDEA-12 Regional Director Gil Castro nga nagpabilin silang positibo sa mga kasong atubangon ni Mayor Lopez, tungod wala nagpasabot nga kon nagnegatibo kini sa drug test, wala na kini kalambigitan sa mga transaksyon sa iligal nga droga.
Sumala pa nga ang buot ipasabot lamang sa resulta sa drug test nga dili man user, apan purong drug dealer ang Maasim mayor.
Kahinumduman nga nagpabilin kini sa kustodiya sa PDEA-12, human mitahan sa mga otoridad kaniadtong adlaw’ng Biyernes pinaagi ni Sen. Manny Pacquiao.
Matud ni Director Castro, padayon gihapon nilang ipailawom si Lopez sa imbestigasyon, lakip na ang mga high profile personalities nga anaa sa ‘greenbook’ nga narekober sa iyang rest house.
