GENERAL SANTOS CITY- Miusbaw ang kita sa Bulaong Terminal ning tuiga.
Kini ang gibutyag sa Bombo Radyo ni Restituto “Jong” Facurib, officer-in-charge sa nasampit nga terminal. Sumala pa nga gikan sa P9 milyon, misaka kini ngadto P12 milyon.
Matud ni Mr. Facurib, ang naasoy’ng pag-usbaw sa kita sa ilang buhatan ang gituuhang gumikan sa insaktong implementasyon sa monitoring sa sistema sa pag-isyu ug pag-retrieve sa departure ticket.
Gibutyag nga matag public utility nga mu-turno ug mubiya sa terminal ang mubayad alang sa departure ticket, kung asa P50 sa matag bus, P30 sa van, P20 sa jeep, ug P15 sa matag multicab.
Sumala pa nga matag mularga nga sakyanan ang gaagi sa inspection area outpost nga ga-kolekta ug bayad, hinungdan nga sa matag adlaw, magkantidad matud pa ug dili muubos sa P31,000 ang kita sa terminal matag adlaw.
Luyo nga walay quota, gibutyag ni Facurib nga ginapaningkamutan nilang makab-ot ang target pinaagi sa City Treasurers Office.
Matud ni Facurib, usa lamang kini sa mga kalambuan ug kabag-uhan nga namatikdan sa City Terminal.
