GENERAL SANTOS CITY -Nagpabilin sa talandugon nga sitwasyon sa Dr. Jorge P. Royeca Hospital ang usa ka dispatcher sa van human gipusil sa wala mailhing suspek.
Nahitabo ang insidente pasado ala-1:00 sa kaadlawon sa Ardonia St. Brgy Lagao ning dakbayan.
Giila ang biktima nga si Gilario Torquator, 27 anyos, residente sa nasampit nga lugar. Nakaangkon ang biktima ug samad-pinusilan sa ulo.
Blangko karon ang pamilya sa biktima kalabot sa kinsa ang posibleng suspek gumikan walay nasayran nga may nasuko o nakabangi niini.
Apan gikabutyag nga una ang insidente, nakig-inum pa ang biktima sa likod sa ilang panimalay.
Sa karon padayong giatiman sa mga doktor ang biktima sa nasampit nga ospital, samtang nagpadayon ang imbestigasyon sa Lagao Police Station.
Kahibaluan nga pila lamang ka metro gikan sa nasampit nga presinto sa lugar kung asa nahitabo ang nasampit nga pagpamusil.
