GENERAL SANTOS CITY – Hugtanong gikondena sa mga miembro sa media sa Soccsksargen ang pagpamusil patay sa usa ka mediaman sa Kalanawe Dos, President Quirino, Sultan Kudarat.
Sa pakighinabi sa Bombo Radyo GenSan, gibutyag sa media practitioner nga si John Paul Jubilag nga nagkatrabaho sila sa biktima nga si Leodoro Diaz sa Sapol Tabloid sugod pa niadtong 2007. Matud pa, bag-o lang nga gikuha ang biktima isip writer sa Manila Bulletin.
Nasayran usab ni Jubilag ngadto sa mga kaubanan sa buhat didto sa Sultan Kudarat nga naka-istorya kanila si Diaz bag-o pa man kini gipusil nga aduna na kiniy nadawat nga bahad sa kinabuhi.
Lakip matud pa sa gisulat sa biktima ang pagbatikos sa mga Bureau of Custom officials sa Luzon kabahin sa kontrobersiyal nga shipment sa shabu kantidad og P6.4-B gikan sa China.
Duda ni Jubilag nga adunay kalabotan ang motibo sa pagpatay sa biktima ang trabaho niini isip miembro sa media.
Nanghinaut si Jubilag nga mahatagan og hustisya ang kamatayon sa kaubanan sa buhat og suod nga higala.
Si Diaz, gipusil patay kagahapon samtang sakay sa iyang motorsiklo og paingon unta sa Tacurong aron mukuha sa iyang report.
Swerte nga wala naigo sa pusil ang anak og pag-umangkon nga angkas niini.
