GENERAL SANTOS CITY- Dakong tabang usab alang sa internally displaced persons (IDP) o bakwit gikan sa Marawi, ang Bombo Medico 2017 nga matigayon na ning adlawa, Hulyo 9.
Kini ang gibutyag ni Ruhana Mariano, usa sa mga bakwit nga mibalhin dinhi sa siyudad partikular sa Brgy Bula, kauban ang siyam pang mga kabanay.
Kagahapon sa hapon, usa si si Ruhana sa mga tawo nga milinya sa sibyahanan, aron makaapas ug makakuha ug Bombo Medico card.
Matud pa, dakong tabang ang naasoy’ng medical, dental ug optical mission sa Bombo Radyo, hilabi na kanila nga mga IDPs nga nakasinati gihapon ug grabeng trauma samtang ang uban ang nagkasakit na.
Sumala pa nga dili nila makaya nga makapakonsutla sa doktor o kaha makapalit ug tambal ug bitamina gumikan kulang usab sa salapi human gibniyaan ang iyang panginabuhian sa Marawi aron makalikay sa kagubot.
Hinungdan nga dako matud pa ang ilang pasalamat sa Bombo Radyo Philippines alang sa nahisgutang proyekto.
Ug gani, excited na matud pa sila ug ang ilang pamilya nga muadto ning adlawa sa venue sa Golden State College Brgy Lagao campus, aron makadawat ug libreng medical consultation, lakip na mga tambal, bitamina, ug uban pa.
