GENERAL SANTOS CITY – Hustisya ang singgit sa pamilya usa ka pulis nga matud pa kini gikulata sa ilang mga tag-as nga opisyal.
Giila ang biktima nga pulis nga si Po1 Kevin Lugan, taga-T’Boli, South Cotabato.
Kahibaluan nga base sa pahayag sa usa ka Alyas Tok, kauban ni PO1 Lugan sa trabaho, Lunes, Hulyo 3, gipatawag matud pa si PO1 Lugan ug lain pang siyam ka mga kaubanan ug gipa-report sa buhatan sa RPSB-12 alang sa selebrasyon kalabot sa promotion ni P/S/Supt. Beranggo.
Gipangpugos matud pa sila nga muinom ug bino, kung asa usa matud pa ang mibalibad, apan gipangkulata na hinuon matud pa sila sa ilang mga tag-as nga opisyal.
Matud sa laing usa ka kauban ni PO1 Lugan nga nakahinabi sa Bombo Radyo, posibleng nakursunadahan sila sa ilang mga opisyal, gumikan namatikdan matud pa nga dihang mibalik ang 10 nga gipatawag, may mga marka ug gapanakit ang kalawsan sa mga nasampit.
Sa pagkakaron, padayong nagpaalim si PO1 Lugan sa usa ka balay-tambalanan dinhi sa dakbayan, kung asa human na matud pa kining na-operahan gumikan sa kanunay’ng gireklamong pagsakit sa tiyan nga bahin.
Malaumon ang mga kabanay sa nasampit nga pulis nga mahatagan ug hustisya ang nahitabo kang PO1 Lugan, hilabi na nga wala sila nagdahum sa mahitabo niini.
