GENERAL SANTOS CITY – Blangko pa ang kapulisan sa motibo sa pagpusil-patay sa usa ka lalaki kagabii sa Amao Rd. kanto Gensanville Subd. Brgy Bula ning dakbayan.
Kini ang gibutyag ni Police Chief Inspector Bryan Salvacion, hepe sa Bula Police Station, kung asa biktima giilang si Jomar Alpeche Alyas Pi-ang, 33 anyos, residente sa Gensanville Phase 1.
Base sa inisyal nga imbestigasyon, pasado alas-6:00 kagabii samtang gamaneho ug motorsiklo ug pauli na, samtang ang iyang kapuyo ang gasunod sakay sa usa ka traysikad.
Kalit matud pang gitaparan ang biktima sa laing naka-motorsiklo dayon gipusil.
Matud ni Chief Inspector Salvacion, lima ka empty shells sa caliber 45 pistol ang nakaplagan sa crime scene, apan upat lamang ka samad-pinusilan ang naangkon sa biktima, duha sa likod ug duha sa ulo, nga maoy hinungdan sa iyang hinanaling kamatayon.
Gipailawom sa post mortem examination ang patay’ng lawas sa biktima, samtang padayon sa pagpangita ug witness ang kapulisan, alang sa pagpangalap ug dugang impormasyon kalabot sa background sa biktima.
Kini hilabi na nga bisan ang pamilya ug mga higala niini ang blangko sa posibleng motibo sa pagpatay sa biktima ug sa mga posibleng responsable sa krimen, hilabi na nga buutan matud pa kini, gawas sa pagkahilig sa sabong.
