GENERAL SANTOS CITY – Patay ang usa ka sikad driver human gipusil sa wala pa mailhing suspek, kaganihang kaadlawon, sulod sa ilang panimalay sa Brgy Conel ning dakbayan.
Giila ang biktima nga si Neil Mark Bactol alyas Mac-mac, 21 anyos, ulitawo, residente sa nasampit nga lugar.
Sa pakighinabi sa Bombo Radyo sa iyaan sa biktima nga Marites Bactol, alas-2:30 sa kaadlawon dihang nadunggan ang duha ka buto.
Nasayran nga namasada ug sikad ang amahan sa biktima dihang natigayon ang insidente, ug kauban lamang niini sa panimalay ang magulang nga usa ka special person.
Matud usab sa lain pang iyaan nga si Ronalyn Bactol, alas-11:00 kagabii miuli ang biktima gikan sa iyang amo.
Sa pamahayag sa nasampit nga una nahitabo ang insidente, may miabot nga nakamotorsiklo nga lalaki nga nangita sa amahan sa biktima. Apan dihang giingnan nga namasada, gimanduan siya nga tawgan, ug nadunggan na gilayon ang mga buto sa pusil.
Matud usab sa uyuan niini, nadunggan niya nga nag-istoryahanay pa ang biktima ug laing duha ka lalaki kung asa may nadunggan matud pa siya nga nasuko nga gaistorya.
Dihang nadunggan niya ang pag-andar sa motorsiklo ug mibiya, nagtuo siya nga miuban ang iyang pag-umangkon. Apan dihang iyang gitan-aw, nakita na lamang niya nga nagbuy-od na ang biktima.
Gikabutyag nga nakaangkon ang biktima ug igo-pinusilan sa agtang.
Padayon pa sa pagsusi sa crime scene ang mga otoridad.
