GENERAL SANTOS CITY – Usa ang patay usa ang samaron sa natigayong pagpamusil kagabii sa Blk 5, Llido Subdivision, Brgy Lagao ning dakbayan.
Giila ang namatay nga si Rodel Nain, 30 anyos, usa ka driver nga residente sa Malungon, Sarangani, base sa nakuha nga ID sa kapulisan.
Nakaangkon kini ug samad-pinusilan sa dalunggan nga maoy hinungdan sa iyang hinanaling kamatayon. Samtang ang kauban niini nga nagpabilin karon sa balay-tambalanan giilang si Joey Abraham, 29 anyos, usa ka helper, nga residente gihapon sa nasampit nga lugar.
Nakaangkon kini ug lima ka samad-pinusilan sa nagkalain-laing bahin sa lawas, ug 12 ka bun-og sa ulo nga gikabutyag nga gibunalan ug pusil sa wala mailhing suspek.
Sa inisyal nga imbestigasyon, alas-6:30 kagabii nahitabo ang insidente, pauli na gikan sa party ang duruha ug gabaktas sa nasampit nga lugar, dihang miabot ang duha ka lalaki nga sakay sa usa ka motorsiklo, dayon gipangpusil ang duruha, dayon paspas nga misibat.
Narekober sa crime scene ang tulo ka empty shells ug usa ka fired bullet.
Padayon na ang imbestigasyon sa kapulisan ang naasoy’ng insidente.
