GENERAL SANTOS CITY – Miabot na ngadto sa 64 ka mga miyembro sa New Peoples Army (NPA) ang misurender sa 10th Infantry Division Philippine Army, gikan Enero hangtod Marso ning tuiga.
Matud ni Col. Tyne Bañas, labaw sa 1002nd Infantry Brigade Philippine Army, 29 sa nasampit nga ihap ang mitahan sa ilahang brigade.
Mukabat usab sa 26 ka mga armas ug 26 usab ka Improviced Explosive Device kon IEDs ang nakumpiska sa 10th ID, ug 27 ka mga kampo sa mga rebelde ang nailog.
Dungan niini, subling giawhag ni Col. Tyne ang mga nahibiling rebelde sa kabukiran nga mutahan na ug mubalik sa sabakan sa gobyerno.
Sumala pa nga dili angayang mahadlok, gumikan luwas ang ilang pagtahan sa gobyerno ug makabag-o kini sa ilang kinabuhi.
Mahimo matud pang makig-alayon sa mga opisyal sa barangay, sa kapulisan o kang kina man alang sa pakig-alayon alang sa ilang pagsurender.
Kahibaluan nga ang mga musurander ang hatagan ug livelihood assistance sa gobyerno pinaagi sa Comprehensive Local Integration Program kon CLIP, gawas pa sa dugang cash kon makadala ug makasurrender ug ug armas.
