GENERAL SANTOS CITY – Hugot pa karon nga gitun-an sa mga tinahasang ahensya sa lokal nga gobyerno ang problema sa political boundaries sa mga silingang munisipyo.
Matud pa ni Vice Mayor Shirlyn Banas Nograles nga hangtud karon wala pay ensaktong data nga gihuptan ang syudad kung pila ka ektarya sa yuta ang maapektuhan.
Gikadugang pa sa nasampit nga angayang sutaon ang tanang mga posibilidad nga makaapekto ngadto sa dakbayan.
Gibutyag ni Nograles nga sa Malungon ilang gibana-banaan nga mukabat ngadto sa 4,000 ka ektarya ang problema.
Kung basehan ang political boundary tali sa Malungon adunay portion sa Pulutana, Malandag og Lamcanal ang gipanag-iyahan sa dakbayan.
Apan may lugar usab nga giserbisyohan ang Gensan ang gipanag-iyahan sa Malungon.
Gawas sa Malungon adunay problema usab sa Maasim lakip na sa Tboli kung asa apektado ang Barangay San Jose og Sinawal sa syudad.
Una niini mihangyo ang Sangguniang Bayan sa Malungon nga magpahigayon og joint session sa Sangguniang Panlungsod aron hisgutan ang maong isyu.
Giangkon ni Nograles nga sa data nga gigamit sa syudad nga mukabat ngadto sa 50,000 hectares ang land area sa GenSan apan 49,000 hectares kung basehan ang data gikan sa Department of Budget Management.
