GENSAN- Unom na katao ang natala nga namatay sa mga nahitabong vehicular accident sa dakbayan karong bulan sa Uktobre.
Subay sa datos sa Traffic Enforcement Unit (TEU) GenSan sa pagpanguna ni PLt. Col. Patrich Elma, sukad niadtong Oktubre 6, lima ang namatay sa tulo ka disgrasya sa dalan nga naglakip sa pagbanggaanay tali sa single motorcycle og single motorcycle ug single motorcycle vs sikad, samtang usa usab ang natala nga pedestrian nga namatay.
Gipadayag ni Elma nga gikan sa Enero hangtod Setyembre karong tuiga, miabot na sa katibuk-ang 1,692 ka vehicular accidents ang narehistro sa dakbayan.
Apan giklaro nga kadaghanan sa maong mga kaso ang nagmalampuson nga naareglo sa matag tagsa-tagsa ka partido. Ang nag-unang hinungdan sa mga disgrasya mao ang overspeeding o pagpadagan og kusog kaayo, sayop nga pagliko og iligal ug peligroso nga pag-overtake.
Namatikdan usab sa mga awtoridad nga kadaghanan sa mga driver nga nadisgrasya labi na ang mga nagmaneho og single motor ang walay ginasul-ob nga helmet ug wala usab makapakita og driver’s license.
Pahimangno ni Elma sa tanang mga sumasakay ug drayber nga magmatngon sa tanang higayon samtang nagsubay sa kadalanan.
