GENSAN- Gipahibalo sa Department of Education (DepEd) General Santos City ang pagpatuman sa mga kausaban sa iskedyul sa klase ug pagpakunhod sa mga kalihokan sa mga estudyante aron malikayan ang mga sakit tungod sa grabeng kainit sa panahon.
Sumala ni Dr. Isagani S. Dela Cruz, CESO V, Schools Division Superintendent sa DepEd GenSan, nagpagawas og memorandum ang Central Office nga naglatid sa mga lakang nga angay sundon sa mga eskwelahan depende sa lebel sa ‘heat index’.
Gipasabot ni Dela Cruz nga kon moabot sa 42 degrees Celsius ang ‘heat index’, kinahanglan nang suspindihon ang klase ug tanang kalihokan sa eskwelahan.
Samtang kon anaa sa 33 ngadto sa 41 degrees Celsius ang heat index, gikinahanglan ang pagpakunhod sa mga kalihokan sa mga estudyante.
Mahimo usab nga suspindihon ang klase kon adunay hulga sa ilang panglawas ug kaluwasan tungod sa grabeng kainit.
Gitumong sa maong mga lakang ang pagpanalipod sa mga estudyante batok sa mga sakit ug uban pang posibleng epekto sa grabeng kainit sa panahon.
