GENERAL SANTOS CITY – Laing usa ka miyembro na usab sa New Peoples Army sa Brgy Datal Anggas, Alabel, Sarangani ang mitahan ug nang mubalik sa sabakan sa gobyerno.
Kini ang gikumpirma sa Bombo Radyo ni Lt. Daryl Cansancio, tigpamaba sa 73rd Infantry Battalion Philippine Army.
Giila ang nasampit nga si Alyas Malinawon, 38 anyos, miyembro sa Guerilla Front 71, ilawom sa pagdumala ni Alyas Dong. Bitbit matud pa ni Alyas Malinawon ang iyang garrand rifle dihang mitahan sa mga opisyal sa barangay, kagahapon sa kaadlawon.
Gisaysay matud pa niini kon sa unsa sila gisaaran sa mga lider nga ayuhon ang ilang dalan, patukuran sila ug kaugalingong barangay hall, ug hatagan ug mga eskwelahan, health center, ug scholarship alang sa ilang mga anak, ug P5,000 matag bulan aron muapil sa kalihukan.
Apan bisan singko sentimos wala matud pa silay nadawat, ug kon may matigayong engkwentro sila ang ibala samtang ang mga kumander ang una nang misibat.
Sa karon gikatakdang ipailawom sa pagsuta si Alyas Malinawon lakip ang iyang armas nga gi-surrender, alang sa mga benepisyo nga iyang madawat gikan sa gobyerno gumikan sa pagtahan.
Sa karon, 14 na matud pa ka mga miyembro sa NPA ang nasikop ug mitahan sa 73rd IB, sa nagpadayon nilang paggukod sa mga rebelde, human giwagtang ang peacetalks.
