GENERAL SANTOS CITY – Gitambagan una ang kabanay ni Aiza Claudio, ang OFW nga nakauli sa nasud apan wala na sa kaugalingon human giabuso sa iyang amo sa Kuwait, nga dili una kaayo siya istoryahon.
Kini human nakauli ang nasampit sa ilang panimalay sa Brgy San Isidro ning dakbayan, human gihatod mismo sa mga taga-OWWA gikan sa Kauluhan ug Koronadal, kauban ang iyang inahan gikan sa Kaulahan.
Matud sa amahan niini nga si Narding, aduna pay mga tambal nga angayang imintina ni Aiza alang sa anam-anam niining pagka-recover.
Gikabutyag usab nga under-observation sa mga doktor ang kondisyon ni Aiza.
Hinuon, mipasalig matud pa ang OWWA nga padayong mutabang kanila sa mga panginahanglanon sa nasampit nga OFW.
Nanghinaot na lamang karon ang mga kabanay ni Aiza nga maka-recover pa kini gikan sa trauma nga gumikan sa pagpasakit kaniadto kaniya sa iyang amo didto sa Kuwait, gawas pa nga wala usab gipakaon.
Samtang, giasikaso na usab matud pa ang kaso batok sa agency ni Aiza.
