GENERAL SANTOS CITY – Gipahugtan sa Police Regional Office-12 ang intelligence operations sa Columbio, Sultan Kudarat aron maluwas ang duha ka sundalong gidagit sa New People’s Army o NPA.
Kini sumala pa ni Pro-12 Spokesman, Supt. Romeo Galgo Jr, isip suporta sa Philippine Army nga naka-deploy sa naasoyng lugar.
Apan, blangko gihapon ang militar og police intelligence units kung unsang unit sa NPA ang midagit sa mga sundalo og asa ensaktong lugar gidala silang Solaiman Calocop og Private 1st Class Samuel Garay nga mga sakop sa 39th Infantry Battalion.
Basi sa army intel report, gikanayong gidala ang mga nasampit sa boundary sa Sultan Kudarat og Davao Del Sur partikular sa kabukiran sa Kiblawan kung asa may kusog nga presensya ang rebeldeng grupo.
Kahinumduman nga sakay silang Calocop og Garay og motorsiklo dihang giharang sa halos 20 rebelde sa Brgy. Telefas, Columbio, niadtong Miyerkules ug gidala.
