Gikuwestyon sa pipila ka vendors sa General Santos City ang temporaryong pamaagi sa lokal nga panggamhanan sa pagdumala sa problema sa kahinlo sa Central Public Market, ilabi na ang pagbalhin kanila sa gawas sa merkado samtang nagpadayon ang mga kalihukan sa pag-ayo ug paghan-ay sa lugar.
Matud ni Leticia Vibar, spokesperson sa Central Public Market, dili uyon ang pipila ka vendors nga ibutang sila sa temporaryong pwesto nga mahimong mas makapasamot pa sa kahugaw sa palengke tungod sa kakulang sa drainage system sa maong lugar.
Sumala kang Vibar, dugay nang reklamo sa mga mamaligya ang kahimtang sa palengke ug ang ilang gusto mao ang adunay tarong, luwas, ug hapsay nga kabalhinan nga dili makadugang sa problema sa basura, hugaw nga tubig, ug kahumot sa palibot.
Gipasabot niya nga andam ang mga vendors nga mosuporta sa mga lakang sa LGU Gensan, apan gilauman nila nga ang solusyon dili lang temporaryo, kondili usa ka pamaagi nga makahatag og dugayng kaayohan alang sa mga namaligya, mamalitay, ug tibuok merkado.
Matud pa niya, kung ibutang ang mga vendors sa gawas nga walay hustong pasilidad sama sa drainage, posibleng mas mudako pa ang problema sa kahinlo nga mao unta ang gustong sulbaron.
Naglaum ang mga vendors nga madungog sa LGU Gensan ang ilang hangyo alang sa mas organisado ug angay nga temporaryong lokasyon samtang gipangita ang permanenteng solusyon sa kahimtang sa Central Public Market. __
