Usa ka unit sa Yellow Bus Line nga adunay sakay nga mga pasahero nasunong sa Tupi, South Cotabato

SOUTH COTABATO – Nasunong ang usa ka unit sa Yellow Bus Line mga alas sais ang takna sa miaging gabii sa Tupi, South Cotabato.

Sumala sa usa ka pasahero, gikan sa Koronadal City ang bus ug padulong sa General Santos sakay ang anaa sa 30 ka pasahero.

Pag-abot sa Barangay Crossing Rubber, Tupi, South Cotabato, duna’y nag-aso sa likod nga bahin sa maong bus.

Gilayon nga gipahunong ang bus ug gipanaog ang mga sakay niini.

Nasayran nga duna’y kalit mibuto sa likod nga bahin sa bus nga maoy resulta sa pagdilaab sa kalayo.

Nakaresponde gilayon ang mga bombero sa Tupi, lakip na ang rescue ambulance.

Samtang wala’y natalang nasamdan sa maong panghitabo ug nagpadayon ang imbestigasyon sa mga otoridad.