GENERAL SANTOS- Pagdula ug posporo ang usa sa gituuhang hinungdan sa natigayong sunog sa Glan, Sarangani nga gikamatay sa tulo ka managsuon ug pagkasunog sa pipila ka panimalay.
Padayon ang gihimong imbestigasyon ng Bureau of Fire Proteksyon sa Glan, aron matumbok ang tinuo nga hinungdan sa sunog nga gikamatay sa managsuon nga silang Carlito Abellanosa, 4-anyos, ug kaluha nga silang Chara Mae ug Chara Jane, nga magsaulog unta sa ilang ikaduhang adlaw’ng natawhan sa Biyernes, Setyembre 29.
Kahibaluan nga base sa imbestigasyon, miadto ang inahan sa mga biktima balay-tambalanan gumikan sa usa ka anak nga na-confine.
Gisirad-an matud pa niini ug gibutangan ug harang ang pultahan sa ilang panimalay aron dili makagawas ug makalaag ang mga anak.
Sumala pa nga nagsugod ang sunog sa balay sa managsuon ug naangin ang lain pang unom ka panimalay nga gama sa light materials hinundgan nga paspas ang pagdako sa kalayo.
Gikabutyag nga mahiligon sa pagdula ug posporo ang 4-anyos nga si Carlito, kung asa kini ang gidudahang hinungdan sa sunog.
Nasayran nga atua sa Bohol karon ang amahan sa mga bata ug wala pa nasayod sa nahitabo sa iyang pamilya.
