GENSAN- Hugot nang gipatuman sa Department of Education Gensan Division ang pagdili sa mga magtutudlo nga mamaligya og bisan unsang klase sa pagkaon sulod sa classroom.
Kini ang gipaklaro ni Kenneth Carisma, Public Information Officer sa DepEd Gensan.
Sumala kaniya, adunay opisyal nga school canteen sa matag tulunghaan busa dili na kinahanglan nga mamaligya pa ang mga magtutudlo ngadto sa mga estudyante sulod sa classroom.
Gipatin-aw usab ni Carisma nga mas maayong sa school canteen na lamang mopalit og pagkaon ang mga estudyante aron masiguro ang hustong pagdumala sa pagkaon, kalimpyo, ug kahapsay sulod sa eskwelahan.
Matod pa sa DepEd, adunay pipila ka mga eskwelahan nga adunay teachers’ cooperative nga nagbaligya og produkto ilabi na pagkaon.
Apan gitugotan lamang kini kon ibutang sa canteen area ug dili himuon sulod sa classroom.
Samtang, gimando sa division office ang tanang school principal nga hugot nga bantayan ug imonitor ang ilang mga magtutudlo aron masiguro nga walay molapas sa maong polisiya.
Dugang pa sa DepEd, nakasabot sila nga adunay ubang mga magtutudlo nga nanginahanglan og dugang kita o extra income, apan kinahanglan gihapon nga sundon ang mga balaod ug polisiya sa departamento alang sa kaayohan sa mga estudyante ug sa hustong kahapsay sulod sa mga pampublikong eskwelahan.
