Giklaro sa lokal nga gobyerno sa General Santos City nga magplano sila og pakigpulong kang Vince Dizon sa Department of Public Works and Highways aron ipadayag ang mga problema nga giatubang sa underpass project sa National Highway sa syudad.
Sumala kang Mayor Lorelie Pacquiao, ilang tuyo nga masuta kung unsa gyud ang hinungdan sa paglangan sa proyekto ug kung kanus-a kini tinuod nga mahuman, ilabi na karon nga giusab ang design tungod sa mga mitumaw nga isyu sa konstruksyon.
Gipunting usab sa mayor nga grabe na ang epekto sa mga negosyante sa palibot sa proyekto tungod sa dugay nga konstruksyon. Daghan na ang nagreport og pagkunhod sa halin ug ang uban napugos na sa pagsira tungod sa gamay nga mga kustomer nga makalusot sa lugar.
Bisan pa sa mga problema, misalig ang LGU human sa pakighinabi kang contractor Vicente Lao nga target sa Hulyo mahuman ang ubos nga bahin sa proyekto aron makasunod na sa sunod nga phase sa konstruksyon.
Naglaum si Mayor Pacquiao nga matuman ang saad sa contractor aron maminusan ang grabeng trapiko, ilabi na panahon sa rush hour, ug mabalik ang normal nga dagan sa negosyo sa maong lugar.
