GENERAL SANTOS CITY – Dako ang posibilidad nga maporma ang low pressure area (LPA) sa silangang bahin sa Mindanao isip unang bagyo ning tuiga, sumala sa state weather bureau. Matod pa nga ang LPA mahimong maporma isip tropical depression nga tawgon nga “Aghon”.
Ang weather disturbance gipaabot nga mulihok sa amihanan-kasadpan hangtod sa Sabado, ug mosubay sa amihanan-sidlakang direksyon sa Domingo, Mayo 26.
Bisan tuod wala gipaabot nga mo-landfall ang bagyo, kini gibanabana nga mulihok duol sa Bicol Region-Eastern Visayas area karong Sabado.
Usab, bisan tuod ang bagyo gipaabot nga magpabilin sa baybayon apan duol kini sa Luzon-Eastern Visayas landmass, ang kasamtangang agianan niini mahimong mausab tungod sa lapad nga sirkulasyon sa direksyon niini.
Gipahimangnoan usab ang publiko batok sa posibleng pagsaka sa tropical cyclone wind signals sa pipila ka bahin sa nasud, partikular sa Bicol region ug Eastern Visayas sa inisyal nga tropical cyclone bulletin nga ipagawas ning adlawa, Mayo 24, 2024.
Ang trough o extension sa LPA mahimong makaapekto sa amihanan-sidlakang bahin sa Mindanao nga magdala ug panagsa ngadto sa kasarangan ug usahay kusog nga pag-ulan sa Surigao del Norte, Surigao del Sur ug mga isla sa Dinagat.
Ning adlawa, kasarangan ngadto sa kusog ang pag-ulan sa Eastern Samar ug Northern Samar samtang hinay ngadto sa kasarangan ang anaa sa Bicol Region, ubang bahin sa Caraga ug pipila ka bahin sa Eastern Visayas.
Busa gipahimangnoan ang mga residente sa nahisgutang mga lugar nga magpabiling alerto sa posibleng pagbaha ug pagdahili sa yuta.
Ang LPA sa Philippine area of responsibility nasigpatan sa 870 kilometros silangang bahin sa habagatan-sidlakang Mindanao.
