Gidepensahan ni Senador Robin Padilla ang kaubang senador nga si Ronald “Bato” Dela Rosa human pangutan-on sa media ang bahin sa giingong pagtago niini bisan pa sa arrest warrant nga gi-isyu sa International Criminal Court.
Sa interbyu niadtong Lunes, Mayo 18, giingon ni Padilla nga ang iyang nahibal-an mao nga dili gusto ni Dela Rosa nga “makidnap,” isip tubag sa mga pangutana nganong wala matod pa kini magpakita sa publiko.
“Basta ako si Bato ayaw niyang makidnap,”matod ni Padilla.
Kini ang unang public appearance ni Padilla sukad niadtong Huwebes, diin gitaho nga kuyog matod pa niya si Dela Rosa sa paggawas niini sa Senado pipila ka oras human sa insidente sa pagpamusil sulod sa senado.
Mibalibad si Padilla sa pagkumpirma kung siya ba mismo ang nagmaneho o naghatod kang Dela Rosa paggawas sa Senado, apan giingon niyang motubag siya sa tanang pangutana pinaagi sa hustong imbestigasyon.
Giingon usab niya, base sa pahayag ni Senate President Alan Peter Cayetano, nga walay naglungtad nga warrant of arrest batok kang Dela Rosa busa wala’y rason nga moingon nga adunay krimen nga iyang gilikayan.
Gipanghimakak usab ni Padilla ang mga report nga nakita nila si Dela Rosa sa Ninoy Aquino International Airport o nga mibiya sila sakay og yate. Matod niya, dili na makatarunganon nga magpakita sila sa maong mga lugar kung tinuod nga adunay plano nga mogawas sa nasod.
