Pormal nga gipasidunggan sa House of Representatives ang Filipino pop group nga BINI human kini nakahimo og kasaysayan isip unang Filipino pop group nga nagpasundayag sa Coachella Valley Music and Arts Festival.
Kini nagsunod sa House Resolution No. 93, diin giila sa House ang dakong kontribusyon sa grupo sa pagpalapad sa impluwensya sa P-pop ug Original Pilipino Music (OPM) sa international scene.
Dugang nga gipahayag sa resolusyon nga ang kalampusan sa BINI nagpakita sa nagkadako nga presensya sa mga Pilipinong artista sa tibuok kalibutan ug nagsilbing inspirasyon sa mga nagtinguha nga artista ug mga mamugnaon sa tibuok nasud.
Sumala ni House Majority Leader Ferdinand Alexander “Sandro” Marcos III, ang kalampusan sa BINI nagpakita sa talento ug pagkamamugnaon sa mga Pilipino.
Dugang pa sa kongresista nga ang grupo usa ka inspirasyon sa mga batan-ong Pilipino nga nangandoy nga makahimo og ngalan alang sa ilang kaugalingon sa industriya sa musika ug mamugnaon.
Ang BINI gilangkoban nila ni Aiah, Colet, Maloi, Gwen, Stacey, Mikha, Jhoanna ug Sheena.
Samtang, angay hinumdoman nga ang grupo bag-o lang nagpasundayag niadtong Abril 10 ug 17, 2026 sa Empire Polo Club sa Indio, California, diin gikanta nila ang pipila sa ilang mga sikat nga kanta sama sa “Pantropiko,” “Karera,” ug “Salamin, Salamin,” lakip na ang bag-ong kantang “Blush.”
