Patay ang 18-anyos nga ulitawo samtang kritikal usab ang iyang duhaka manghod human sila gilangluba sa ilang uyuan didto sa Barangay Owak, lungsod sa Asturias, western Cebu, kagahapon.
Dali gilayong naskop ang 46-anyos nga suspetsadong si George Batomalaque, sa gilusad nga manhunt operation sa mga sakop sa Asturias Municipal Police, didto sa Barangay Vito, lungsod Balamban, kondiin mitahan siya sa usa ka local official.
Ang biktimang si Kyle Padilla, gideklarang dead-on-arrival sa usa ka public hospital sa Cebu City human nga wala na makaya ang daghang samad-dinunggaban gikan sa 12-pulgadas nga kutsilyo samtang ang iyang mga manghod usab nga sila alyas Gerald, 10-anyos ug alyas Princess, 8-anyos, pabiling anaa sa kritikal nga kondisyon tungod sa daghang samad usab nga ilang na-angkon.
Nasuta sa imbestigasyon sa kapulisan nga natulog ang mga biktima sa ilang kwarto dihang gipangluba sila sa ilang uyuan kondiin daling nakasibat si Princess ug nakapangayo og tabang sa ilang mga silingan.
Parehong naka-angon og sa samad-dimunggaban ang mga biktima sa ulo, agtang, likod ug parte sa lawas.
Gika-ingong dugay ra matud pang duna’y bangi ang suspek sa namatay human niini giselosan ug gidudahang hinigugma sa iyang asawa taliwa nga iya ra kining pag-umangkon ug nasuta pa nga nakalalis na kaniadto sa suspetsado ang amahan sa mga biktima.
Gikostudiya na sa Asturias Municipal Police Station ang suspetsado nga mag-atubang og mga kasong murder ug frustrated murder.
