Nagpadayon ang kabalaka sa nagkadaghang basura nga ginapanglabay sa kadagatan nga maoy giila karon nga usa sa pinakadakong hulga sa kalikupan. Sumala kang Cirilo Lagnason Jr., Protected Area Management Office superintendent, kinahanglan nga ampingan ug protektahan ang kadagatan aron mapadayon ang kaayohan niini alang sa umaabot nga henerasyon.
Matud pa niini, dili lamang dapat magsalig ang mga tawo sa mga benepisyong ginahatag sa dagat sama sa pagkaon ug panginabuhian, kundili adunay usab responsibilidad ang matag usa sa pag-atiman ug pagpanalipod niini.
Gipasiugda kini atol sa selebrasyon sa Month of the Ocean ning bulana, diin nagkahiusang nanawagan ang mga opisyal ug environmental groups alang sa mas limpyo ug luwas nga kadagatan pinaagi sa husto nga pagdumala sa basura ug paglikay sa polusyon.
Nag-awhag usab ang mga otoridad sa publiko nga mahimong responsable sa paglabay sa basura ug aktibong motabang sa mga kalihokan alang sa pagpreserba sa atong kadagatan
