Luwas nga na-evacuate ang mga pasahero ug crew sa usa ka cruise ship nga naigo sa hantavirus outbreak.
Sumala sa mga opisyal, walay nagpakita og sintomas sa mga pasahero nga gipahawa gikan sa barko.
Gidala sila sa Tenerife airport pinaagi sa mga military bus sa wala pa pasakyon sa mga eroplano sa ilang tagsa-tagsang nasod.
Hugot nga gipatuman ang no-contact policy sa mga pasahero aron malikayan ang posibleng pagkaylap sa virus.
Girekomenda usab sa World Health Organization (WHO) ang 42 ka adlaw nga quarantine alang sa tanang nagsakay sa barko isip paglikay.
Lakip sa mga nasod nga nagpadala og mga eroplano alang sa ilang mga lungsoranon mao ang Spain, France, United Kingdom, Canada, United States, Netherlands, Turkey, Ireland, Australia, ug uban pa.
Base sa report sa WHO, pipila ka kanhing pasahero nga nakagawas na sa barko ang nagsakit, ug tulo kanila ang namatay na. Gituohang posible nga nakuha nila ang impeksyon sa wala pa sila makasakay sa cruise ship ug mikaylap kini samtang nagbiyahe.
Samtang, gipasalig sa health authorities nga ubos ra ang peligro sa virus sa publiko ug padayon usab ang hugot nga pagsusi ug monitoring sa mga naapektuhan.
Human sa evacuation, limpyohan ug i-disinfect ang barko sa Netherlands, samtang pipila lamang ka crew members ang magpabilin aron mopadayon sa operasyon niini.
