Hukman karong adlawa Lunes, Mayo 11, sa Kamara si Vice President Sara Duterte aron pormal nga palig-onon ang report sa House Committee on Justice nga nag-ingon nga adunay “probable cause” sa reklamo nga impeachment batok sa Bise Presidente.
Kini human sa pipila ka semana nga pagdungog ug pagsusi sa mga dokumento ug ebidensya nga nagtinguha nga mapamatud-an ang mga alegasyon batok kang VP Sara.
Hisgutan usab sa plenaryo ang committee report ug resolusyon nga mag-abri sa dalan aron ipadala sa Senado ang upat ka Articles of Impeachment para sa pagdungog.
Sumala kang Justice panel chairperson ug Batangas Rep. Gerville Luistro, andam na ang komite nga ipaglaban sa plenaryo ang ilang findings aron makakuha og igo nga boto.
Sa miaging boto sa Justice committee, 53-0 ang resulta aron ilhon nga adunay probable cause sa impeachment ni VP Sara Duterte.
Ubos sa Konstitusyon, kinahanglan ang 1/3 nga boto o 106 ka boto gikan sa 318 ka miyembro sa Mababang Kapulungan sa Kongreso aron mapasa ang impeachment ug mapadala kini sa Senado nga magsilbing impeachment court.
Ang botohan himuon pinaagi sa nominal voting, diin tagsa-tagsa tawgon ang mga kongresista aron moboto og “oo” o “dili.”
Hisgutan sa plenaryo ang upat ka giusa nga Articles of Impeachment nga gipirmahan sa Justice panel, sama sa giingong sayop nga paggamit sa kapin P600 million nga confidential funds, dili klaro nga bahandi sa Bise Presidente, alegasyon sa suhulan sa Department of Education, ug giingong pagpanghulga batok kang Pangulong Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Bisan pa niini, nagpasidaan ang Partido Demokratiko Pilipino–Lakas ng Bayan (PDP Laban) nga dili nila dawaton sa ilang partido ang mga kongresista nga moboto pabor sa impeachment sa Bise Presidente.
I-blacklist usab kuno sila ug dili tugotan nga modagan ilawom sa PDP Laban sa umaabot nga eleksyon.
