Nagplano ang Philippine National Police – Criminal Investigation and Detection Group (PNP-CIDG) nga mag-isyu og subpoena batok kang Senador Ronald “Bato” dela Rosa isip kabahin sa pag-usab pag-abri sa imbestigasyon sa kapin 100 ka reklamo may kalabotan sa giingong extrajudicial killings sa Davao Region.
“The CIDG will issue a subpoena tomorrow to General De La Rosa to appear personally before the CIDG office here in aid of the investigation of the previous crimes,” matod ni Remulla.
Sumala kang Department of the Interior and Local Government (DILG) Secretary Jonvic Remulla, ipatawag ang senador aron personal nga motubag sa CIDG isip kabahin sa imbestigasyon sa mga insidente sa dihang siya pa ang Davao City Police Office director ug regional police chief sa rehiyon.
Gipatin-aw usab sa opisyal nga dili kini arrest warrant gikan sa International Criminal Court ug wala usab plano nga dakpon si dela Rosa.
“There will be no handcuffs. It is merely a subpoena for investigation, not an arrest warrant,” dugang sa Kalihim.
Giingon sa CIDG nga gusto nila direkta nga madungog ang pikas bahin ni dela Rosa, nga kaniadto usab hepe sa Philippine National Police sa panahon sa war on drugs sa miaging administrasyon.
Sa laing bahin, gibutang na usab sa alert status ang mga tugpahanan, pantalan, ug uban pang exit points sa nasod aron mabantayan ang lihok ug posibleng paggawas sa senador samtang nagpadayon ang imbestigasyon.
