Nagpaklaro ang Philippine Institute of Volcanology and Seismology (PHIVOLCS) nga walay direktang epekto sa Pilipinas ang twin earthquake nga mitay-og sa Venezuela kaniadtong miaging adlaw.
Matud ni Nane Danlag, Science Research Analyst sa PHIVOLCS-GenSan, lahi ang mga fault ug trenches sa Venezuela ug sa Pilipinas, busa dili pasabot nga kung adunay paglihok sa usa ka fault line o trench sa laing nasud, maapektuhan usab dayon ang mga fault lines dinhi sa Pilipinas.
Gipasabot ni Danlag nga ang matag fault ug trench adunay kaugalingong geological system ug paglihok. Busa, ang linog nga nahitabo sa Venezuela dili direktang hinungdan aron molihok usab ang mga fault line o trenches sa Pilipinas.
Bisan pa niini, gipahinumdoman gihapon sa PHIVOLCS ang publiko nga magpabiling andam sa posibleng mga linog tungod kay nahimutang ang Pilipinas sa Pacific Ring of Fire, diin kanunay adunay kalihokan sa mga fault ug bulkan. Giawhag usab ang tanang katawhan nga sundon ang mga earthquake preparedness measures aron malikayan ang dakong kadaot kon adunay linog nga mahitabo sa nasud.
