GENERAL SANTOS CITY – Tulo ka mga indibidwal ang gisukit-sukit sa kapulisan human nakuhaan ug kinarton nga mga sigarilyo samtang karga sa usa ka sports utility vehicle pasulod sa Syudad.
Gidakop nilang Police Capt. Ulf Tabucon ang mga suspek nga silang Abdul-Aziz Sappayani Jalim, 34 anyos residente sa Purok Esteros, Barangay Tamontaka, Cotabato City, kauban ang nagpangalan ug Mashrim Noh Sulaiman, 35 anyos walay trabaho molopyo gihapon sa sama nga lugar, ug si Armando Resurection Ventosa, 52 anyos usa ka self-employed nga residente sa Prk 23, Uhaw, Brgy Fatima, General Santos City.
Pasado alas dose sa kaadlawon ang mga elemento sa San Isidro Police station nagpahigayon ug Oplan Sita sa Diversion Road, Purok Udagre, Brgy Conel, aron bantayan ang sakyanan nga may karga nga karton sa mga sigarilyo.
Pipila ka minutos ang milabay miagi gayud sa lugar ang usa ka sakyanan nga may plate number NQZ 250 nga gisakyan sa tulo ka mga suspek. Nakuha ang siyam ka karton sa sigarilyo nga kantidad ug P81,000.
Giandam na sa kapulisan ang kaso nga pagsupak sa Custom and Tariff Act. Una nga nasikop sa mga otoridad didto sa Polomolok ang tres syentos ka ream sa palusot nga sigarilyo human nasikop ang suspek nga si Yusoph Ansao, nga taga Purok Malinawon, Barangay Poblacion, nga nakuhaan ug P150,000 nga kantidad sa palusot nga sigarilyo.
