Nagsugod na ang bag-ong kapitulo sa higher education sa General Santos City human opisyal nga giablihan ang Kolehiyo ng Heneral Santos o KHS niadtong Agosto 17, 2026.
Ang KHS mao ang kaugalingong higher education institution sa dakbayan nga gitukod aron mahatagan og mas duol ug mas abot-kayang oportunidad sa pag-eskwela sa kolehiyo ang mga kabatan-onan.
Sa unang tuig sa operasyon niini, 220 ka estudyante ang naka-enroll sa tulo ka degree programs nga gitanyag sa eskwelahan.
Lakip niini ang Bachelor of Physical Education, Bachelor of Early Childhood Education ug Bachelor of Science in AgriBusiness.
Gipahigayon ang opisyal nga pag-abli pinaagi sa Holy Mass, ribbon-cutting ceremony, campus blessing ug programa nga nagtimaan sa pagsugod sa operasyon sa KHS.
Gipahayag ni Mayor Lorelie Geronimo Pacquiao ang iyang kalipay sa pag-abli sa institusyon, nga dugay nang gipaabot sa dakbayan.
Matud sa alkalde, usa sa tumong sa lokal nga pangagamhanan ang paghatag og dugang oportunidad sa mga kabatan-onan nga makapadayon sa ilang pagtuon ug maandam alang sa mas maayong kaugmaon.
Sa pag-abli sa KHS, gilauman nga mahimong dugang kapilian kini sa mga estudyante sa General Santos City nga nangita og kalidad ug mas accessible nga higher education.
