Dako ang kadaot nga na-angkon sa tulo ka barkong panagat nga gipanag-iya sa MGTR Fishing Corporation human kini gilamoy sa kalayo sulod sa kompanya sa Barangay Tambler, General Santos City, hapon sa Miyerkules, Hulyo 1.
Base sa report sa Bureau of Fire Protection (BFP)-General Santos City, nagsugod ang sunog alas-2:19 sa hapon ug hingpit nga napalong alas-3:18 sa maong adlaw pinaagi sa paspas nga pagresponde sa mga bombero.
Sa inisyal nga imbestigasyon, ang tulo ka barko ang naigo sa sunog nga nahitabo sa pantalan o compound sa kompanya. Wala pa usab gitaho kon adunay mga nasamdan o namatay sa insidente.
Padayon karon ang imbestigasyon sa BFP-General Santos City aron matino ang tinuod nga hinungdan sa sunog ug mahibal-an ang kinatibuk-ang kantidad sa mga kadaot nga nahimo sa insidente.
Samtang gisusi pa ang maong panghitabo, nagpadayon usab ang pagkuha sa mga otoridad og dugang ebidensiya ug testimonya aron masuta ang gigikanan sa kalayo.
