Nipirma si US President Donald Trump sa usa ka executive order aron i-rebrand ang Pentagon isip Department of War.
Gipirmahan sa Presidente sa US ang mando sa Oval Office sa White House kaniadtong Biyernes, Setyembre 5.
Matod ni Trump, ang bag-ong ngalan sa departamento mas haom tungod sa kasamtangang kahimtang sa kalibotan ug sa kamatuoran nga ilang gipasigarbo ang labing gamhanang militar sa kalibotan.
Gitugotan sa EO ang Secretary of Defense sa Department of Defense ug ubos nga mga opisyal sa paggamit sa ikaduhang titulo sa Secretary of War, Department of War ug Deputy Secretary of War sa official correspondence, public communications, ceremonial contexts ug non-statutory documents sulod sa executive branch. Ang mga opisyal nagsugod sa pagpatuman niini gipatuman dayon.
Ang tanan nga mga executive department ug agencies gimandoan usab nga ilhon ang bag-ong mga titulo sa secondary titles sa internal ug external communications ug ang Kalihim sa Depensa nga si Pete Hegseth gimandoan nga magrekomenda sa mga aksyon, sa lehislatura ug ehekutibo, nga permanenteng magtawag sa US Department of Defense ingon ang US Department of War.
Kahinumduman nga giusab sa mga opisyal sa Pentagon ang signage sa gawas sa opisina ni Hegseth ingon man sa website sa departamento aron maapil ang US Department of War labaw sa Department of Defense.
Matod ni Hegseth, ang pag-ilis sa pangalan sa departamento dili lang “renaming” kon dili “restoring” diin ang ilang militar dili lang motutok sa depensa kon dili sa opensa ug matod niya ang pag-usab sa maong ahensya nagpakita usab sa revamp sa mga warriors o manggugubat nga dili lang mga tigdepensa.
Dili pa sigurado karong panahona kung kinahanglan ba nga moagi sa Kongreso aron permanente nga usbon ang ngalan sa departamento sa Depensa sa US.
