Misaka sa 743 ka kaso sa mga disgrasya sa kalsada sa General Santos City gikan Enero hangtod Abril ning tuiga, sumala sa Traffic Enforcement Unit Gensan, nga nagpakita sa padayon nga problema sa kaluwasan sa trapiko sa syudad.
Sa datos, ang Enero ang adunay pinakataas nga naitalang fatalities nga 8 ka insidente, gisundan sa Marso nga 6, Pebrero nga 4, ug Abril nga 3. Bisan pa sa pag-us-os sa ihap sa mga namatay sa pipila ka bulan, nagpabilin gihapon nga taas ang total nga aksidente nga na-record sa unang upat ka bulan sa tuig.
Sumala sa Traffic Enforcement Unit, kasagarang hinungdan sa mga aksidente mao ang human error sama sa sayop nga pagliko, sobra ka kusog nga pagpangagi, ug pagdrayb nga hubog.
Nagpahimangno si Police Lt. Col. Patrich Elma, hepe sa Traffic Enforcement Unit Gensan, nga kinahanglan hugot nga sundon ang mga balaod-trapiko ug mag-amping ang mga motorista aron malikayan ang dugang disgrasya ug maprotektahan ang kinabuhi ug kabtangan.
Gisuportahan usab niya ang mga lakang sama sa pagbutang og center island sa mga lapad nga dalan ug dugang suga sa mga ngitngit nga lugar aron mapalambo ang kaluwasan sa dalan sa syudad.
