Dili na makaapil ang Pilipinong basketbolista nga si Rhenz Abando sa Gilas Pilipinas alang sa ikalimang hugna sa FIBA World Cup Asian Qualifiers human siya nakaangkon og injury sa iyang tuong bukong-bukong.
Nahitabo kini atol sa usa ka duwa sa Korean Basketball League tali sa iyang koponan, ang Anyang Jung Kwan Jang Red Boosters, ug sa Busan KCC Egis kagahapong adlawa
Sa dihang may nahabilin pa nga 26.2 segundos sa ikaduhang kwarter, aksidenteng natumban ni Abando ang tiil sa iyang kauban sa team nga si Rashawn Thomas, samtang nangandam si Thomas sa pagpasa sa bola.
Tungod sa kasakit, gitabangan siya sa iyang mga kauban paggawas sa korte, ug wala na siya mibalik sa duwa. Sa wala pa ang maong injury, nakatala na siya og unom ka puntos ug duha ka rebounds.
Tungod niini, gipahibalo sa Samahang Basketbol ng Pilipinas (SBP) nga dili makauban si Abando sa national team alang sa umaabot nga hugna sa qualifiers.
Ilisan siya ni Troy Rosario, kinsa maoy mokompleto sa 12 ka tawo nga line-up sa Gilas Pilipinas.
Ang Gilas gikatakdang makigsangka batok sa Syria karong Nobyembre 27 ug batok sa Iran karong Nobyembre 29 didto sa Seremban, Malaysia.
Gilauman unta ang pagbalik ni Abando sa national team human sa tulo ka tuig nga pagkawala, sukad sa iyang katapusang pagdula alang sa Pilipinas atol sa 2023 FIBA World Cup.











