GENSAN- Gibutyag ni PLtC. Patrich Elma, hepe sa Traffic Enforcement Unit sa General Santos City, nga padayon ang hugot nga kampanya batok sa mga kolorum nga traysikol isip kabahin sa anti-colorum campaign sa dakbayan.
Mas gipakusgan pa ang pagpangdakop sa mga traysikol nga nag-operate nga walay legal nga prangkisa. Nagtinabangay ang Traffic Enforcement Unit ug ang Public Safety Office sa pagmonitor sa nagkalain-laing kadalanan aron masiguro nga ang nagdagan lamang nga pampasaherong traysikol mao kadtong adunay tukmang dokumento ug rehistro.
Mas pahugtan pa gayud ang operasyon ilabi na kon matapos na ang pagdawat sa aplikasyon alang sa prangkisa.
Sa higayon nga maabot na sa dakbayan ang gitakdang ihap sa de-franchise nga traysikol, pagadakpon na ang mga magpadayon sa ilegal nga pampamasada.
Gipadayag usab ni Elma nga lagmit mikunhod na ang ihap sa mga kolorum sa siyudad, tungod kay daghan na ang mi-apply og prangkisa human kini giabli pag-usab sa lokal nga panggamhanan.
Nagpasabot kini nga daghang operator ang misunod sa balaod ug mipili nga magparehistro aron malikayan ang silot ug pagsita sa mga awtoridad.
Gidasig usab ni Elma ang mga drayber nga wala pa makakompleto sa ilang papeles nga maglihok dayon samtang abli pa ang aplikasyon para sa prangkisa sa traysikol.
