Padayon nga nangayo og mas organisado ug angay nga temporaryong pwesto ang pipila ka vendors sa General Santos City Central Public Market samtang nagpadayon ang lokal nga panggamhanan sa pag-ayo ug paghan-ay sa merkado.
Matud ni Leticia Vibar, spokesperson sa Central Public Market, adunay mga vendors nga nabalaka sa plano nga ibalhin sila sa gawas sa merkado tungod kay kulang sa drainage system ang maong lugar, nga posibleng mosangpot sa mas grabeng problema sa kahinlo.
Sumala kaniya, dugay na nilang gireklamo ang kahimtang sa merkado ug ang ilang gitinguha mao ang usa ka luwas, hapsay, ug angay nga temporaryong balhinan nga dili makadugang sa problema sa basura, hugaw nga tubig, ug dili maayong baho sa palibot.
Gipasabot usab ni Vibar nga andam ang mga vendors nga mosuporta sa mga programa sa LGU General Santos aron masulbad ang problema sa merkado, apan naglaum sila nga ang ipatuman nga lakang dili lamang temporaryong solusyon kondili usa ka pamaagi nga makahatag og dugayng kaayohan alang sa mga namaligya, mamalitay, ug sa kinatibuk-ang palengke.
Naglaum ang mga vendors nga paminawon sa LGU General Santos ang ilang hangyo aron matagan sila og mas angay nga temporaryong lokasyon samtang ginapangita ang permanente ug mas epektibong solusyon sa kahimtang sa Central Public Market
