Usa ka sports car nga gihimo gamit ang 327,906 ka buok sa LEGO Technic ang nakabuhat og bag-ong world record isip pinakapaspas nga LEGO nga sakyanan human kini nakaabot og 111 kilometro matag oras (69 mph).
Ang makatinuod nga replika sa Koenigsegg Sadair’s Spear nakalabaw sa miaging rekord nga 50 kilometro matag oras, nga kapin doble ang kalainan.
Kabahin kini sa selebrasyon sa bag-ong LEGO set, diin ang drayber sa Koenigsegg nga si Markus Lundh maoy nagmaneho sa sakyanan sa bantog nga Goodwood hillclimb circuit.
Sumala kang Lubor Zelinka, design lead sa LEGO, mikabat og 9,400 ka oras o sobra 12 ka bulan ang paghimo sa maong komplikadong proyekto.
Aduna usab kini sa gitawag nga “Ghost Mode” sa Koenigsegg ug nahimong unang full-size LEGO build nga adunay mga panel sa lawas sa sakyanan nga mahimong ablihan.
Ang tibuok sakyanan mitimbang og mga 1,800 ka kilo, diin 400 ka kilo niini mga LEGO plastic. Bisan og LEGO ang gawas nga disenyo, lig-on ang pundasyon niini nga adunay espesyal nga metal chassis, roll cage, tinuod nga Koenigsegg carbon wheels, ug suspension system.
Dili sama sa orihinal nga Koenigsegg Sadair’s Spear nga adunay kusgan nga makina, ang rekord nga LEGO version gipadagan lamang sa gamay nga electric motor apan igo kini aron makab-ot ang bag-ong rekord sa ka paspason
