-- ADVERTISEMENT --

Gipasalig sa Pork Producers Federation of the Philippines Inc. nga igo ang suplay sa karne sa baboy sa nasud alang sa umaabot nga holiday season, diin gilauman nga molapas sa 600,000 metric tons ang sobrang suplay pagsulod sa Enero 2027.

Matod ni Eric Harina, presidente sa grupo, mokabat sa 2.3 million metric tons ang kinatibuk-ang suplay sa baboy karong 2026 gikan sa lokal nga produksyon ug mga inangkat, samtang anaa lamang sa 1.7 million metric tons ang tinuig nga konsumo niini.

Gibalik usab sa grupo ang panawagan nga ibalik sa gobyerno ang 30% ug 40% nga taripa sa imported pork ug hugtan ang inspeksyon sa mga pantalan aron masuta ang posibleng kontaminasyon sa African Swine Fever o ASF ug antibiotic residues.

Giawhag usab ang publiko nga mopalit sa lokal nga preskong karne sa baboy aron masuportahan ang mga Pilipinong magbababoy.

Samtang, gikataho nga naglisod gihapon ang mga lokal nga hog raisers tungod sa ubos nga farmgate price nga anaa lamang sa ₱120 hangtod ₱130 matag kilo sa Mindanao, kon itandi sa gibanabanang ₱180 nga gasto sa produksyon.

-- ADVERTISEMENT --

Nanawagan si Harina sa gobyerno nga susihon ang presyo sa karne sa mga merkado ug ang ginansya sa mga namaligya aron dili kaayo bug-at sa mga konsumidor ang presyo bisan ubos ang halin sa mga magbababoy.