Gisugyot ni Senator Erwin Tulfo nga obligahon ang tanang ahensya sa gobyerno sa pagdawat sa authenticated digital versions sa mga government-issued ID aron mapadali ang mga transaksyon sa publiko. Kini pinaagi sa Senate Bill No. 2590 o “Government-Issued Digital Identification Acceptance Act.”
Ubos sa balaudnon, kinahanglan dawaton sa national government agencies, LGUs ug uban pang ahensya sa gobyerno ang beripikadong digital IDs isip pamatuod sa pagkatawo.
Matod ni Tulfo, gitumong niini nga masulbad ang mga reklamo sa mga Pilipino nga dili madayon ang ilang transaksyon tungod kay dili dawaton ang ilang digital IDs bisan giawhag sila sa paggamit sa eGovPH application.
Gitakda usab sa panukala ang proseso sa pagberipika sa digital IDs, apan mahimo gihapong gamiton sa publiko ang pisikal nga ID ug mangayo ang mga ahensya og dugang nga beripikasyon aron malikayan ang pagpanglimbong ug identity theft.










