-- ADVERTISEMENT --

Misaka na sa P10.44 bilyon ang kinatibuk-ang kantidad sa kadaot ug kalugi nga natala sa Department of Agriculture (DA) sa sektor sa agrikultura tungod sa grabeng epekto sa El Niño.

Kapin sa 338,000 ka mga mag-uuma ug mananagat ang grabeng naapektuhan human gilamoy sa hulaw ang kapin sa 332,000 ka ektarya nga mga umahan sa nagkadaiyang bahin sa nasud. Lakip sa mga nadaot ang mga tanom nga humay, mais, kamoteng kahoy ug high-value crops, ingon man ang mga kahayopan.

Isip tubag sa maong sitwasyon, nakahatod na ang kagawaran og tabang nga mokabat sa P18.64 bilyon ngadto sa mga apektadong sektor pinaagi sa pinansyal nga ayuda, mga binhi, abono ug crop insurance.

Base usab sa pagtimbang-timbang sa Philippine Atmospheric, Geophysical and Astronomical Services Administration kon PAGASA, gilauman nga molungtad ang kusog nga El Niño hangtod sa unang bahin sa 2027 ug posibleng maabot ang pinakagrabeng lebel niini sa dili pa matapos ang tuig.

Gipasalig sa DA nga padayon nilang gibantayan ang sitwasyon aron masubay ang gilapdon sa kadaot ug masiguro ang igo nga suplay sa pagkaon bisan pa sa nagpadayon nga hulaw.

-- ADVERTISEMENT --