Gipahibalo ni Oil Industry Management Bureau Director Rino Abad nga mikabat sa 213 ka gasoline stations ang ilang nasusi atol sa inspeksyon nga gihimo niadtong Nobyembre 10 hangtod 13, diin 114 niini ang nakaplagang wala nagpatuman sa hustong pagpaubos sa presyo sa petrolyo.
Sumala sa ahensya, imbis nga ipatuman ang tukmang bawas-presyo, kulang o dili sakto ang pagkunhod sa presyo nga gipatuman sa pipila ka mga estasyon.
Personal usab nilang gisusi ang 97 sa maong mga gasoline stations aron masiguro ang ilang pagsunod sa direktiba. Niadtong Biyernes, pormal nang gihatag sa grupo ngadto sa legal department sa DOE ang inspection report alang sa tukmang legal nga aksyon.
Kauban niini, nagpahigayon usab og tigom niadtong Biyernes ang mga field offices ug legal services aron hisgotan ang mga lakang nga himuon kalabot sa posibleng pagsang-at og kaso.
Sumala sa ahensya, duha ka nag-unang balaod ang gamiton sa pagtuon sa mga dokumento kon moabot na sa pormal nga pagsang-at og kaso ang mga kalapasan.
Una niini ang Oil Regulation Law, diin ang dili pagsunod sa gimando nga pag-adjust sa presyo adunay silot nga tulo ka bulan hangtod usa ka tuig nga pagkabilanggo ug multa nga P50,000 hangtod P300,000.
Ikaduha ang Presidential Decree 1865, ilabina ang Section 2(E) nga nagdili sa sobra nga pagpataas sa presyo sa mga produktong petrolyo. Ubos niini, ang mga molapas mahimong multahan og P10,000, masuspenso o mabawi ang ilang permit, dugang pa sa criminal penalty nga P20,000 hangtod P50,000 ug pagkabilanggo sulod sa duha hangtod lima ka tuig.
Isip kabahin sa proseso, gihatagan og 72 ka oras ang maong mga estasyon aron mosumite og katin-awan pinaagi sa show cause order.
Kadaghanan sa ilang mga rason mao ang ilang mga stock sa produktong petrolyo nga napalit sa mas taas nga presyo gikan sa ilang mga mother company niadtong miaging semana.
Bisan pa niini, giklaro sa ahensya nga nahisgotan na kini uban sa legal services ug mga oil companies, diin nagkasinabot nga kon ipatuman ang pagsaka sa presyo sa dihang mosaka ang kantidad sa produkto, kinahanglan usab nga ipatuman ang bugti nga pagpaubos sa presyo kon adunay oil price rollback.











