Gipatuman sa Iran ang rotational brownout sa tibuok nasud sugod ning adlaw nga Domingo, Nobyembre 22, human marekord ang kadaot sa nag-unang imprastraktura sa kuryente sa nasud tungod sa nagpadayon nga panagbangi sa Middle East.
Matod ni Mohammad Allahdad, lider sa national electricity company sa Iran, napugos ang sektor sa kuryente nga limitahan ang konsumo niini tungod sa ubos nga suplay sa lana sa nasud.
Matod pa ni Allahdad, tungod sa kahimtang sa suplay sa gasolina sa nasud, mapugos ang sektor sa kuryente nga magpatuman og limitasyon sa pag-apod-apod sa elektrisidad sugod ning Domingo.
Gilauman usab nga molungtad og duha ka oras matag duha ka adlaw ang pagkawala sa kuryente, depende sa lugar o rehiyon.
Ang maong pagrasyon sa kuryente misunod sa gikatahong hiniusang pag-atake sa Estados Unidos ug Israel sa imprastraktura sa enerhiya sa Iran, nga mas nakapasamot sa kakulang sa suplay sa lana tungod sa nagpadayon nga panagbangi tali sa maong mga nasud.
Matod ni Iranian President Masoud Pezeshkian, mas misamot ang sitwasyon human atakehon ang imprastraktura sa gas sa nasud, hinungdan nga gilauman ang mga kalisdanan sa pag-atubang sa tingtugnaw.
Bisan pa man nga nailhan ang Iran sa dagkong reserba sa lana ug natural gas, dugay na kining nag-atubang sa problema sa pagtubag sa panginahanglan sa kuryente ug enerhiya sa nasud.










