Taliwala sa isyu sa giingong iregularidad sa flood control projects nga naglambigit sa pipila ka mga politiko ug contractors, giklaro ni kanhi “Pinoy Big Brother” housemate ug karon construction businessman nga si Slater Young nga wala siyay mga proyekto sa gobyerno.
Si Slater nipagawas og pamahayag sa iyang Instagram stories human gipangutana siya sa usa ka netizen kon nakabenepisyo ba usab siya sa buhis sa katawhan. Siya miingon“I do not have any government projects.”
Sa sunod-sunod nga post, gihisgutan usab ni Slater nga bisan og duha na siya ka dekada sa construction industry, wala gihapon siyay tag-iya og luhong sakyanan sama sa Rolls-Royce.
Ang pamahayag ni Slater daw gitumong ngadto sa kontraktor nga si Sarah Discaya, kinsa giingong nalambigit sa mga iregular nga flood control projects.
Kahinumduman nga atol sa gipahigayong Senate hearing kaniadtong Septiyembre 1, si Discaya niangkon nga nanag-iya siya og daghang mga luxury vehicle sama sa Rolls-Royce, Mercedes Benz, Bentley, Cadillac Escalade, Range Rover, GMC, Suburban, ug G63.
