Gidala na sa ilang katapusang pahulayanan ang siyam ka mga biktima sa landslide nga nahitabo tungod sa kusog nga pag-ulan sa Malapatan, Sarangani Province.
Gipahigayon ang lubong kagahapong adlawa Hulyo 16, 2026, sa Malapatan Public Cemetery, Poblacion, Malapatan, diin mitambong ang mga pamilya sa mga namatyan, mga paryente, ug mga higala nga nagpahayag og pakigduyog sa kasubo.
Lakip sa mitambong ang inahan ni Baby Saviour, nga padayon gihapon nga gipangita sa mga otoridad sa lugar diin nahitabo ang landslide.
Si Mayor Salway “Jun” Sumbo Jr., MMPA, mihatag usab og pakigsimpatya pinaagi sa pagbutang og mga bulak sa matag puntod isip timaan sa iyang pagpakabana ug pakig-uban sa mga pamilya nga nawad-an og mga minahal tungod sa trahedya.
Nagpadayon ang pag-ampo ug pagpangita sa mga posibleng wala pa makit-i samtang nagtinabangay ang mga otoridad ug komunidad human sa makapasubo nga insidente.
