Gitawag ni Professor Mayong Aguja nga dili angay mahimong “drama sa sine” ang nahitabong komosyon sa Senado atol sa panahon nga daghang suliran ang giatubang sa nasud.
Matod niya, nagkasagol ang reaksyon sa katawhan tungod kay ang mga opisyal sa Senado gitamdan isip mga “honorable” nga gisaligan sa pagdumala sa kalinaw ug kalambuan, apan ang ilang nakita sa publiko wala makahatag ug maayong panig-ingnan alang sa interes sa katawhan.
Gipahinumdoman usab ni Aguja nga usa siya sa mga principal author sa Republic Act No. 9851 nga namugna human mipirma ang Pilipinas sa International Criminal Court.
Bisan wala kini ma-ratify, ilang gihimo ang maong balaod nga adunay kaparehong prinsipyo sa Rome Statute apan wala maapil ang “crime of aggression.”
Dugang pa niya, gilatid sa probisyon sa RA 9851 nga kon adunay hangyo gikan sa ICC o ubang international bodies aron ipaaresto ug ipaubos sa kustodiya ang usa ka indibidwal nga nakalapas sa international human rights law, adunay katungod ang gobyerno sa Pilipinas nga mopadali sa maong proseso sa pagdakop ug pagsurender sa maong persona.
