GENSAN – Mahinayon na sa Marso 16 ang senate inquiry kaugnay sa P8.7 billion Road Right of Way Scam nga ipahigayon dinhi sa siyudad.
Kini ang gibutyag sa Bombo Radyo ni Domdom Lagare, staff ni Sen. Manny Pacquiao.
Apan mibalibad una si Lagare sa pagbutyag kon pila ug kon si kinsa-kinsa nga mga senador ang muabot dinhi sa dakbayan alang sa nasampit nga pagdungog, alang sa hisgutanan sa seguridad.
Kahibaluan nga sa Sangguniang Panglungsod planong ipahigayon ang pagdungog, gumikan kini lamang matud pa ang government building nga may Viber optics alang sa pagkuha ug video, ug mas sayon usab matud pa ang pagkontrola sa seguridad sa nahisgutang gambalay.
Gilauman nga sa matigayong pagdungog, madunggan ang habig sa nagkalain-laing mga personalidad nga nalambigit sa nahisgutang kontrobersiya.
Kahinumduman nga wala nahinayon sa mga petsa nga unang gitakda kaniadto, gumikan dili matud pa available silang Senators Richard Gordon ug Sonny Angara, kung asa walay mag-preside.
Hinungdan nga nagmugna matud pa ug sub-committee ang Senate Blue Ribbon commmitte, aron nga kon ugaling dili gihapon mahimong available ang duruha sa nasampit nga petsa, pwede matud pang si Sen. Pacquiao ang maoy magpreside.
